Американската филмска академија ги објави номинациите за доделувањето на Оскарите 2010. Дали фаворитите ги оправдаа очекувањата на публиката? Кои се изненадувањата меѓу потенцијалните лауреати?
Според предвидувањата, Avatar, The Hurt Locker и Up in the Air се најдоа меѓу (оваа година за прв пат) десетте најдобри филмски остварувања и ќе ја предводат битката за најпрестижните статуетки во филмската индустрија во категоријата Најдобар филм. Покрај овие филмови, за потенцијален наследник на минатогодишниот шампион Slumdog Millionaire се и The Blind Side, District 9, An Education, Inglorious Basterds, Precious, A Serious man и анимираниот Up.
Освојувачот на Златен Глобус Џеф Бриџис за улогата во филмот Crazy Нeart според критичарите е првиот избор во петторката која претендира за освојување на Оскарот за Најдобра машка улога. Чекор зад него се Џорџ Клуни (Up in the Air), Колин Фирт (A Single Man), Морган Фримен (Invictus) и Џереми Ренер (The Hurt Locker).
Кај дамите, очекувано (според критиката и досегашните освоени награди) главен фаворит е Сандра Булок (The Blind Side) а друштво во оваа категорија и прават Хелен Мирен (The Blind Station), Кери Малиган (An Education), Габуреј Сидибе (Precious) и Мерил Стрип (Julie & Julia).
Кога се во прашање споредните улоги, кај мажите номинирани се
Мет Дејмон (Invictus), Вуди Харелсон (The messenger), Кристофер Пламер (The Last Station), Стенли Тучи (The Lovely Bones) и Кристоф Волц (Inglorious Basterds). Во истата категорија кај понежниот пол оваа година како фаворитки за Оскар се издвоија Пенелопе Круз (Nine), Вера Фармига (Up in the Air), Меги Гиленхал (Crazy Heart), Ана Кендрик (Up in the Air) и Мо'Ник (Precious).
На повидок е интересен дуел меѓу Џејмс Камерон и неговата поранешна сопруга Kетрин Бигалоу: и обајцата се кандидати за освојување на Оскарот во категориите за Најдобар режисер, а нивните филмови Avatar и The Hurt Locker како што веќе споменавме се во потесниот круг за избор на најдобар филм.
Покрај нив, во номинациите за Најдобар режисер свое место си најдоа и Квентин Тарантино (Inglorious Basterds), Ли Даниелс (Precious) и Џејсон Рајтман (Up in the Air).
Комплетната листа на номинирани може да ја погледнете со клик на сликата десно.
Номинациите ги соопшти Ен Хетавеј во Беверли Хилс, во 14:30. Церемонијата на 82. доделување на Оскарите ќе се одржи на 7. март, а домаќини оваа година ќе бидат Стив Мартин и Алек Болдвин.
