Ракометарите на Металург се победници на 17 Куп на Македонија,
откако во финалето во салата "Борис Трајковски" во Скопје славеа со 29:26 против својот најголем ривал Вардар Про. Ова е втор трофеј за Металурзи во ракометниот Куп на Македонија. Вардар Про и понатаму останува најтрофеен во Купот со седум титули.
Кај Металурзи повеќе од очигледна беше желбата да се спаси сезоната барем со освојување на трофеј во Купот, откако од поодамна е јасно дека шампионскиот пехар ќе отиде во витрините на Вардарци.
Во финалето од Купот видовме максимално фер и коректен меч, возбудлив натпревар со многу пресврти, за на крајот екипата која доминираше во најголемиот дел од дуелот, а тоа беше тимот на Металург, да стигне до посакуваниот трофеј.
Во победничкиот тим на Металурзи, Ристовски забележа 18 успешни интервенции, додека Живковиќ беше најпрецизен на натпреварот со 8 погодоци. Во тимот на "црвено црните" Ракчевиќ зад своето име запиша 6 гола.
